Lyhykäisesti EU:n histuuriasta
Itea ette alottaa EU;n tuli toisen mailmansoan jälkhiin. Kuus maata perustit Eurooppalaisen hiili- ja teräsyhtheisön 1952. Yks ajatus oli ette maat yhessä olisit vastuulisia hiili- ja terätuotanosta, jokka olit tärkeitä raaka-aihneita sotateolisuuessa. Sillä laila menis välttää ette joku yksityinen maa alkais varustamhaan taas. Se oli ensimäinen askel EU:n perustamisheen.
Yhtheistyö meni vuona 1958 jällaahmaan esimerkiksi maapruuki- ja kauppapolitiikkaaki. Koko yhtheistyötä alethiin 1967 kuttumhaan EG:ksi. Eurooppalaiset yhtheisöt.
Jäsenmaitten yhtheistyötä lisäthiin aijan olhoon useamphaan aluheesheen. 1993 EG:stä tuli EU- Eurooppalainen yniuuni. Silloin perustethiin yhtheinen sisänen markkina tavaroile, palveluile, henkilöile ja kapitaalile EU:ssä.
1999 EU pani käynthiin ekonoomisen ja monetäärin yniuunin (EMU) yhtheisellä rahala euro. Euro laitethiin ensinä elektroonisenna rahana ja vuona 2002 tuli euroseeteliä ja kolikoita. Tänäpäivänä 20 EU-maila oon euro rahana. Ruotti ei ole matkassa euroyhtheistyössä.
Vuositten aikana yhä useampia maita oon liittyny EU:n jäseniksi. 1990-luvun keskivaiheessa ja 2013 asti EU kasusi 12 maasta ette niitä enniiten oli 28 jäsenmaata.
EU:ssä oon tänäpäivänä 27 maata joilako yhessä oon suunile 448 miljoonaa asukasta.