EU velkibi

Dola tiijaha Sveittiko ta vaure EU-themmengo themmengiire velkina, save politikaane ringe ta Europako parlamentosko lendi lena dieliba aro parlamentosko saakengo ȟluutiba. Följime europako parlamentosko velkibi aavena stellime berȟ 2029.

Europako parlamentos hin bi endo EU saakengo tšenstino stedos, so hin velkime džeent saarune velkibiessa. Aro Europako parlamentos hin 720 lendi (folkengo naalune) koon aavena are EUsko 27 lendako themmenna. Eurooppako parlamentosko folkengo naalunengo numros hin phandime lendako themmesko folkesko buuribosko numreha. Sveittiko themmes hin 21 Europako parlamentosko folkengo naalune/lendi.  

Lyijako diinibosko horttiba aro EU-velkiba

Aro Sveittiko EU-velkibi hin lyijako diinibosko horttiba ajasaavo komunis, so pherdila 18-berȟȟesko oldra sistones kajo velkibosko diives ta koon hin

• Sveittiko themmeskiiro/-i, koon hin, elle hin aaȟtas liineskiirime aro Sveittiko them, elle
• vauro EU-themmesko themmeskiiro/-i, koon hin registrime aro Sveittiko them ta hin oppenpaaride pes aro velkibosko listos sistones 30 diives angle velkibosko diives

Velkibosko listos hin listos dola komujenna, koonen hin horttiba te den lengo lyija aro džaanime velkiba.

Saare, koon kammena te aaves velkime sar sveittiko folkengo naaleskiiro/-i lendos aro Europako parlamentos, hin mostiba te aaȟȟes lyijako diinibosko horttiba aro velkiba ta politikaano ringos hin mostiba te naujaves les sar lengo kandidaattos.

Sakkaiek Sveittiko themmeskiiro, koon hin registreerime aro vauro EU themme, hin horttiba te den lesko/lako lyija aro puȟȟime themmesko Europako parlamentosko velkiba. Bi tuut hin fani mostiba te aaves registreerime aro douva themmesko velkibosko listos, jakke te tuut aavelas horttiba te del tukko lyija. Dauva saaka fanula aro froojime maneeri are froojime themme.

Tuut hin vojiba te del tukko lyija naalide elle aro velkibosko diives

Aro Sveittiko them EU-velkibi hin stellide itȟlaagimes sar themmune parlamentosko, thaanvitiko elle phuujavitiko velkibi. Doola koonen hin horttiba te den lengo lyija lela lyijako diinibosko peleȟȟos aro lengo postos ta leen hin horttiba te den lengo lyija naalide elle aro velkibosko diives aro lyijako diinibosko stedos.

Doola Sveittko themmengiire koonen buuruvena aro auriakothem hin vojime te biȟaves lengo lyija džinom posta elle den lengo lyija aro Sveittiko themmesko embassaado (themmesko tšenstano biȟibos) ta aro konsulaattos.

Vaure tšimbano rakkiba datta hin vojime te laȟȟes aro teeluno linkos.

Other languages on the website of The Swedish Election Authority