Demokratios
Demokratios mienila, stöttes phennime maneereha, folkeskofalliba elle folkesko volla. Botnosko tenkiba demokratiossa hin douva, te dooles koon hin themmeskiiro elle buurila aro iek them, hin vojiba te lel dieliba te phennes lengo dikkiba dotta sar themmes hyövylas fallaves. Dauva fanula saarunes džeinom sakkavarresko velkibi.
Vauro demokratikaano botnosko tenkiba hin, te saare komuja aaȟȟena itȟleetime ta leen hyövyla aaȟȟes it horttibi. Aro demokratios komujen hin horttiba te rikkaven lengo kokare tenkibi ta džinta, te phennen so joon kammena, ta leen hin horttiba te rakkaven ta rannen lengo džinta phirres uutan darriba.
Demokratios hin vojime te dissuves frooȟlaagimes
Demokratios hin vojime te dissuves frooȟlaagimes ta demokratikaane themme hin velkade froojime veiji (maneera) ta demokraatiive themme hin froojime maneera sar joon hin stellide lengo themmengo fallibi. Koni butide demokratiive themmenna hin velkade penge naaljibosko demokratios. Douva mienila, te buuriboskiire velkina are sakkavarrune velkibi politikaane folkengo naalune, koonen aaȟȟena lengo naalengiire ta fallavena themmes. Sveittiko them hin naaljibosko demokratios.
Kaana themmengiire hin vojiba te len dieliba te tšeeres velkibosko dömme aro froojime puȟȟibi, naalune merkneha aro folkesko lyijako diiniba, douva hin naujime reet/džeent demokratios. Aro Sveittiko them hin aaȟdas themmune folkesko lyijengo diinibi naaluno merkneha atomiakodžooresta ta are EU lendibosta. Sveittiko themmesko saaruno folkesko lyijengo diiniba hin sikjavitiko-diiniba aro velkibi, bi politikaane naalune na hyövyna pherdaves doola velkibiengo auri aaviba.
Raadža (Krajis) hin themmesko praaluno bi les naa aaȟȟela buut volla
Themmesko koni apruno naaluno hin khaarime themmesko praaluno elle themmesko ȟeeruno. Aro Sveittiko them themmesko praaluno/-i hin Krajis elle vollakiiruni Krajisa. Bi themmesko praalunes naa na aaȟȟela politikaano volla aro Sveittiko them, ta les/la hin bi symbolikaane butti.