Laaveskiiresko butti
Laaveskiires hin tilsvaariba parlamentosko buttiako plaanibosta ta pherdibosta. Laaveskiiro liedila parlamentosko buttiako tšeeriba jakkes te jou/joi rakkila parlamentosko ringengo gruppengo liediboskiirensa tšetanes parlamentosko vollako tšenstibongiirensa. Laaveskiiro hin niina parlamentosko pherdino peȟȟibiengo laaveskiiro/-i ta parlamentosko ȟeeruno naaluno are froojime themmune ta internationaale samlibi.
Laaveskiiro hin koni utšide (apride) tšenstakiirino stedos, kai komujes hin vojime aulo velkime aro Sveittiko them. Laaveskiiro hin duito vollakiiro ta reetes paale themmesko ȟeeruno elle Krajisko paalal, ta angle ȟeeruno ministeretta.
Laaveskiiro tšeerela alsiba dotta koonesta aavela ȟeeruno ministeros
Laaveskiiresko koni fuortuno butti hin te liedaves rakkibi kaana falliba hin peeridas ta tšeeres alsiba neevo ȟeeruno ministeresta. Dauva hin koni kuttis fanime, bi hin jakkes aro Sveittiko them. Are vaure parlamentarikaane demokratie fallibosko paruviba hin saarunes liedime themmesko ȟeerunesta.
Parlamentosko laaveskiiro hin auri politikaano buttiatta. Laaveskiiro hin velkime aro folkengo velkibi sar folkengo naaluno, bi sar laaveskiiro jou/-i na lela dielos aro vollakotšetibiengo butti naaka aro parlamentosko bari hisbako peȟȟibiengo butti ta aro lengo velkibi. Laaveskiires hin lesko duito laaveskiiro, koon tšeerela lesko kokaro stedosko butti sar folkengo naaluno.