Tiljime velkibi
Parlamentos hin vojiba te stelles tiljino velkiba maȟkar saaruno velkibosko tiija. Tiljino velkiba fanuvela itȟlaagimes sar saaruno velkibi, bi buut stöttime fäärdibosko tiijaha.
Peȟȟime parlamentos hin volla te dömmaves dotta te tiljuno velkiba hin hyövime maȟkar saaruno velkibosko tiija. Doolesko paalal Parlamentos velkila velkibosko diives. Velkibi hin mostiba te stellaves triin tšoon paale douva dömmös.
Ke majoritetos (ȟeeruno dielos komujenna) aro Parlamentos naa passena aro ȟeeruno ministeros elle vauro fallibosko ministeros leen hin vojiba te stellel bipassibosko lau prissi falliba. Ke Parlamentos tšeerela bipassibosko lau prissi ȟeeruno ministerosko falliba, ȟeeruno ministeros ta lesko/lako falliba hin mostiba te džal nikki (fallibos peerela) ta leen hin mostiba te stellel neeve tiljune velkibi.
Ke Parlamentosko laaveskiiresko alsiba dotta koonesta aavela ȟeeruno ministeros na aavela bojjime
Kaana falliba hin peeritas douva hin parlamentosko laaveskiiresko tilsvaariba te roodes apre alsiba dotta, koonesta aavela neevo ȟeeruno ministeros/-i. Ke parlamentosko laaveskiiro staar var na lela lesko alisiba džeinom aro parlamentos dotta, koonesta vela neevo ȟeeruno ministeros, tiljime velkiba hin hyövime te stelles. Bi douva faniba hyövyla tiljime velkiba niina aaven stellime kajo triin tšoonesko tiija.
Tiljime velkibi na lela nikki normaalo velkiba
Tiljime velkiba na paruvela normaalo velkibiengo tiija. Doola folkengo naalengiire koonen aune velkime aro tiljime velkiba, naa byrjyvena neevo staar berȟesko tiija, bi joon peȟȟena endo kajo douva tiija kaana normaalo velkibi aavela stellime.
Tiljime velkiba aavela stellime biofti aro Sveittiko them. Paale douva tiija, kaana demokratios byrjyde aro berȟ 1920, tiljime velkibi hin aulo stellime bi iek var. Douva sas vauro duitujako velkiba so aulo stellime 1. Džondribosko tšoon 1958.