E Riksdageskere zadače
I Riksdag tani hembari odlučibaskiri skupština ki Švedia. Sako štarto berš o švedžania birinena save 349 manuša ka predstavinen olen ko parlamenti. Ola so bešena ko parlamenti akharenape členia.
Odlučinena bašo kanunia hem e državakoro budžeti
Jekh tari e parlamentareskiri hemvažno zadača tani te odlučinel kanunia. O predložime kanunia butfar avena tari i vlada ama isto šaj te aven taro jekh ja pobut parlamenteskere členia. Sa o predlogia spreminenape ko skupštinakoro odbor angleder o parlamenti te glasinel olenge ko domi.
I Riksdag isto odlučinela bašo e državakere računia hem prihodia ko državakoro budžeti. Odova o parlamenti kjerela keda i vlada predstavinela o predlog budžeteske predložibaja sar ka koristinenpe e vladakere love.
Kontrolirinela e vlada
Jekh aver zadača so isi e parlamente tani te kontrolirinel sar i vlada izvšinela pli buti. O členia šaj te postavinen pučiba e ministarenge ki vlada. E Riksdageskoro konstituciakoro skupštinsko odbor, KU, kontrolirinela te i vlada sledinela o pravilia. Te e parlamente nae doverba e premijereske ja avere ministereske šaj o parlamenti te glasinel baši bidoverba protiv o ministeri.
Kjeriba buti e EU-pučibaja
I Riksdag kjerela buti e EU- pučibaja. I vlada mora te dogovorinelpe e parlamentea baši savi linia i Švedia ka vodinel ko EU. Panda sar prvobitno o pobut predlogia so o parlamneti odlučinela avena taro o EU.
Barabar e vladaja, o parlamenti isto tano uključimo ko formiriba i švedikani avrunidizjakiri politika.