I Riksdag ko društvo
O Riksdag, i vlada, ogan uprave hem o opštine tane ko misal javno aktoria ko amaro društvo. Isi but javno organ uprave hem avera javno organia ki Švedia.
I Riksdag
I Riksdag tani hembari odlučibaskiri skupština ki Švedia. E parlamenteskere obaveze tane te odlučinel kanunia hem bašo o državakoro budžeti. I Riksdag kontrolirinela isto sar i vlada primeninela pli buti. O odluke so anelape taro o parlamenti važinena ki soro Švedia.
I vlada
Keda o biračia odbirindže save 349 členia ka bešen ko parlamenti, imeninela o parlamenti jekhe premijere. Palo odova o premijeri odbirinela kola ministeria ka pripadinen ki vlada. I vlada mora te potpirinelpe ja te toleririnelpe taro o parlamenti, inače šaj te ovel primorimi te podnesinel odstavka.
I vlada upravinela e državaja, odolea so anela predlogia so o parlamenti ka valjani te odlučinel. E vlada isto isi odgovornost te primeninel odola odluke so odlučindžepe taro o parlamenti.
Organ uprave
O organ uprave ka obezbedinen e vladakere hem e parlamenteskere odluke te oven sprovedime. O organ uprave tane podredime teli i vlada.
O opštine
Ki Švedia isi 290 opštine. Ki sako opština isi skupština opština. Odote anenape odluke taro opštinakere političaria so važinena baš odole opštinake.
Regionia
Isi 21 regionia ki Švedia. Olengere šerutne zadače tane te grižinenpe baši e sastljaribaskiri služba hem javno soobračaj. Ki regionikani skupština opština anenape politikane odluke e regioneske.
O krisia
E krisakiri odgovornost tani te sudinel e kriminalcon hem te rešinel sporia maškar o državjania ja sporia maškar državjania hem organ uprave. Sarine tretirinenape isto anglo o kanuni.
EU
I Švedia tani členi ki Evropikani unia, EU. Odola kanunia so i EU odlučinela utičinena sarinenge so bešena ki Švedia.
Medije
O medije tane uključime hem deluinena ko društvo. Ko misal kontrolirinena e parlamente, e vlada, organ upraven hem e organizacien.