Buttepan dre riksdagen
Riksdagen kammar 349 stammoa. Manuscha kai beschar dojj vällkras vri svakko starrto berscht. Kammaren aschar karrado ’dó riksdagengro sii’, avvar je baro del fonn dolleskro politiska buttepa aschar ninna dre’ann politikke partigrupper ta utskott.
Riksdagsledamöterna buttar tchi tellan riksdagen avvar buttar forr sire vällkrepangre te bescha dojj forr starr berscht tchiro. Passke ler dollen prejjsepa kai arvode, tchi lön. Tchommena ledamöter motte kera vri sire uchlepan dives ta ratti, svakko dives, saro bercht. Lenngro dinnstrepa achar tchi blott dre riksdagen avar ninna avri riksdagen, vaverstädes eller ninna dre vaver temm.
Ledamöterna ler 75.500 svakko monnt kai jonn prejjsar skatt fonn.
Dre kammaren rakkrar ledamöterna ta ler beslut
Kammaren, eller plenisalen, aschar siijan fonn riksdagen. Odojj rakklar riksdagsledamöter palla sassare puttchepan kai les an beslut pallan.
Dre kammaren rikkras imansall debatter palla specifika puttchepan, interpellationsdebatter ninna ministrar ta regeringen. Bareder debatter kai partiledardebatter rikkras butten vollter tella je berscht. Je parti motte ninna kräva att je debatt rikkras palla je särskild puttchepa.
Utskotten förbereder beslut
Je baro kotta fonn dova politikko buttepa keras vri dre politikke partigrupper ta riksdagens 15 utskott.
Dolla ledamöter kai aschar fonn emlego parti kerar pre je politikko partigrupp kettanes. Da’dri rakkras palla sassare viktiga puttchepan glan lenngro beslut les an, dre utskott ta kammaren.
Dre utskotten förbereds sassare beslut fonn ledamöterna kai pali les an dre riksdagen. Pallan dova je utskott kerat pre je förslag aschar tchiro forr riksdagens 349 ledamöter te dela si stämma to dova.
Dre svakko utskott aschar 17 ledamöter. Utskotten aschar kai je kutti riksdag, sosske dollen aschar procentuellt sammansatta kai riksdagen fonn vri’ann politikko parti. Dova baredera palitikko parti dre riksdagen aschar ninna baredera dre utskotten.
Dre EU-nämnden les EU-politiken fonn regeringen an. Regeringen aschar uchlo te kamma rakkrepa to EU-nämnden glan trissepa dre EU:s ministerråd eller kanna dollen kammar trissepa masskar vavra temmengre statschefer dre Europeiska rådet.