Demokrati
Demokrati motte hejjas kai ”dolla temmengre fonn je temm styr temmen”. Dova glanduno dennkrepa dre demokrati aschar att manusch dre je temm ler te hunka ninna te dennkra ta le beslut pallan tchakkes temmen ska styras. Dova keras masskar vällkrepan kai keras pre regelbundet.
Je vaver demokratisk dennkrepa aschar att sassare manusch kammar emlego kuschepa kai manusch ta emlege horrtepan. Dre je demokrati motte manuscha dennkra så dollen volltrar ta ninna kamma möjlighet te pukka vri sire dennkrepan.
Demokrati motte dikkas vaverschanot vri
Demokratier motte fungera vaverschanott. Dre tchomena demokratiska temmar styrs temmen vaverschanott fonn vavera temmar. Butten demokratiska temmar kammar je system kai karrar representativ demokrati. Dova aschar kanna dolla temmengre manuscha vällkrar sire politiker dre vällkrepan. Svedikko-temmen aschar je representativ demokrati, kaj politiker vällkras vri forr te styra temmen.
Kanna manuscha ler te ascha ninna te le beslut dre je särskild puttchepa, kai dre je folkomröstning, karrar dova direkt demokrati. Dre Svedikko-temmen har savia folkomröstingar kerats pre palla kärnkraft ta EU-medlemsskapet. Resultat fonn savia vällkrepan aschar forr te sikkra dromm forr politiker, avvar jonn aschar tchi tvungna te kera tchakke manusch dennkrar ta vällkrar.
Krajjon hunkar statschef avvar kammar kutti makt
Dova prallstuno rakkrepaskro forr je temm karrar statschef. Dre Svedikko-temmen aschar krajjon eller kralian statschef. Avvar dollo kai aschar statschef kammar tchi nani politisk makt. Dolleskro roll aschar blott symbolisk.