Tchakke butt mollar EU
Sass EU:ngro buttepa aschar prejjsadott fonn lovijar kai dolla EU:ngre temmar prejjsar to EU svakko berscht. Baropan pre dova mollepa avar an pre svakko temmengro förmåga te prejjsa. Dova barodera kotta fonn lovijarna kai avar prejjsade to EU avar to-pall to prejjsepaskron kai bidrag.
Je dennkrepa aschar kai kettanes-kerdo buttepa hasstrar dolla EU:ngre temmar te ava pre je emlego nivå fonn barvalopa. Je baro kotta fonn dova EU:ngro kissik avar brukt forr regional utveckling, jordbruksstöd, forskning ta klimatarbete, avvar ninna forr te parra dromm to’an je glanepa kai EU aschar butter miljövänlig ta digital.
Dova Svedikko-temmeskro avgift to EU ta lovengro hasstrepa fonn EU
Tella pansch berscht, fonn 2018 to 2022, prejjsade Svedikko-temmen 35–52 miljarder Svedikke lokk to EU svakko berscht, ta ledde to-pall 12–16 miljarder Svedikke lokk kai lovengro hasstrepa fonn EU. Vidder avade lovengro hasstrepa direkt prejjsade to myndigheter, universitet ta högskolor dre Svedikke-temmen fonn EU-kommissionen.
Dova EU:ngro kissik aschar pasch-kerdo pre into jeffta kottar. Dova barodera kotta jar to jekk område kai karrar Sammanhållning och värden. Fonn dova delas lovengro hasstrepa vri forr utveckling ta hasstrepa forr parrepa to’an je samhälle kai aschar butter miljövänligt ta digitalt.