Vällkrepa to riksdagen
Svakko starrto berscht, pre dova dyto kurko-dives dre september, aschar vällkrepa forr riksdagen. Samme dives aschar ninna vällkrepa to regioner ta kommuner.
Riksdagen aschar dova temmengro prallstuno kettanepa mé horrtepa te le beslut. Lenngro uchlepa aschar te kera pre lagar ta le beslut palla lovengre puttchepan forr saro temm. Riksdagen dikkar ninna to tchakke regeringen kerar vri siro buttepa.
Dre 2022 berschengro vällkrepa delade 84,2 procent fonn dolla temmengre siro stämma. Dova vaver vällkrepa aschar tella berscht 2026.
Dova Svedikko system forr vällkrepa aschar proportionellt. Dova hejjas kai, kessi procent fonn sassare stämmer svakko politikko parti ler, dre dova temmengro vällkrepa, tchakke baro procentuell kotta fonn stammoa dre riksdagen ler dollen. Kettanes aschar 349 stammoa dre riksdagen, kai karrar mandat. Je politikko parti motte le butter fonn 4 % te mukkas andri riksdagen.
Svedikke temmengre motte dela si’ stämma dre vällkrepa forr riksdag
Horrtepa te dela si stemma dre vällkrepa forr riksdag kammar dollo kai hunkar Svedikko medborgare, ta kai kammar 18 berscht pre dova dives vällkrepan aschar, ta kai aschar ranndrade dre Svedikko-temmen.
Dollo kai volltrar te ava stämmd pre te ava andri riksdagen motte kamma horrtepa te dela si stemma, ta hunka nominerad. Dova aschar kanna je politiskt parti vällkrat vri dollo te hunka rakkrepaskro forr lenngro parti. Dollo kai vällkras vri fonn je parti motte penna ”ehe!” forr te föreslås.
Je stammo dre riksdagen aschar panndlo to dollo vällkrado. Je ledamot kai mukkar siro politikko parti, eller parrar politikko parti tella tchiro masskar dy vällkrepan, motte bescha pali utan te hunka ninna je politikko parti.
Dova politikko parti eller dolla politikke partier kai lett buttedera kotta fonn sassare stämmer, forr lenngro politik ta buttedera stammoa dre riksdagen, ler te kerar pre je regering. Kavva karrar parlamentarism.
Politikke partier dre riksdagen 2022-2026
Åjjto politikke partier aschar dre riksdagen fonn 2022:to to 2026:to bescht. Tchakke butt stammoa kammar dolla åjjto politikke partier palla vällkrepan 2022:to berscht:
- Socialdemokraterna (S) 107 stammoa
- Sverigedemokraterna (SD) 73 stammoa
- Moderaterna (M) 68 stammoa
- Vänsterpartiet (V) 24 stammoa
- Centerpartiet (C) 24 stammoa
- Kristdemokraterna (KD) 19 stammoa
- Miljöpartiet (MP) 18 stammoa
- Liberalerna (L) 16 stammoa