Extra vällkrepa
Je extra vällkrepa to riksdag motte keras pre masskar ordinarie vällkrepan. Dova aschar kai je ordinarie vällkrepa, avvar tchiron forr förberedelser aschar kuttier.
Je besschto regering motte le beslut palla extra vällkrepa, tellan tchiron masskar ordinarie vällkrepan. Regeringen pukkar dives forr vällkrepan. Vällkrepat ska keras pre glaner än trinn monnter fonn lenngro beslut.
Om dova baredera kotta fonn riksdagengre stammoa tchi kammar pattchepa to regeringen, eller je minister, motte je misstroendeförklaring keras vri. Dre je savi process ler riksdagen beslut pallan om dollo minister eller saro regering ska stakkras fonn sire stammoa.
Om talmannens föreslagna statsminister tchi les an
Kanna je regering stakkrar teli aschar dó forr talmannen te föreslå je nevo statsminister. Motte lo tchi lattcha je savo fonn starr föreslag motte je extra vällkrepa keras. Je savo vällkrepa ska keras pre dre’ann je tchiro fonn trinn monnter.
Dolla ordinarie vällkrepan parras tchi vri
Je extra vällkrepa parrar tchi dives forr je ordinarie vällkrepa. Dolla kai manusch delar sire stämmer to dre je extra vällkrepa farrar tchi an te bescha dre riksdagen forr starr berscht. Dolla beschar blott tella tchiron to dova vaver ordinarie vällkrepa keras pre.
Pallan demokratin farrade an tellan dolla 1920:te berschen har blott jekk extra vällkrepa kerats pre, dova glanduno juni 1958.