Bargu riikkabeaivvis
Riikkabeaivvis leat 349 áirasa, geat válljejuvvot juohke njealját jagi almmolaš válggain. Riikkabeaivvegámmir lea riikkabeaivvi guovddážis, muhto olu politihkalaš barggut čađahuvvojit maid bellodatjoavkkuin ja maid lávdegottiin.
Riikkabeaivi ii virgát riikkabeaivveáirasiid. Jienasteaddjit leat jienastan sin čohkkát riikkabeaivvis vissis áigái. Danin sii ožžot mávssu ja eai bálkká. Áirras bargá jándora birra, birra jagi. Bargu ii leat ráddjejuvvon bargui riikkabeaivvis, sáhttá maid čađahuvvot omd. dan válgabires áirras ovddasta, eará báikkiin dahje olgoriikkas.
Áirasiid vuođđomáksu lea 75 500 ruvnna mánus ja dan supmis sii mákset vearu.
Riikkabeaivvegámmáris áirasat digaštallet ja mearridit
Riikkabeaivvegámmir, dahje dievasčoahkkinlatnja, lea riikkabeaivvi guovddáš. Dáppe riikkabeaivveáirasat digaštallet dehálaš jearaldagaid ja dáppe riikkabeaivi váldá mearrádusaid.
Riikkabeaivvegámmáris dollet earet eará digaštallamiid áššiid birra, interpellašuvdna digaštallamiid ovttaskas ministeriiguin ja jearahallanbottaid ráđđehusain. Stuorit digaštallamat omd. bellodatjođiheaddjedigaštallamat, čađahuvvot dávjá ovtta jagis. Bellodagat sáhttet maiddái gáibidit ahte riikkabeaivi doallá digaštallama ovtta erenoamáš dehálaš áššis.
Lávdegottit válbmejit mearrádusaid
Stuora oassi politihkalaš barggus čađahuvvo riikkabeaivvebellodagaid bellodatjoavkkuin ja maid daid 15 lávdegottiin.
Áirasat, geat gullet seammá bellodahkii, lea okta bellodatjoavku. Bellodatjoavkkuin digaštallet buot dehálaš jearaldagaid ovdal go áirasat loahpalaččat mearridit lávdegottiin ja riikkabeaivvegámmáris.
Áirasat válbmejit buot riikkabeaivvemearrádusaid lávdegottiin. Go lávdegoddi lea ovdanbuktán su mearrádusevttohusa de buot 349 áirasa riikkabeaivvis mearridit evttohusa riikkabeaivvegámmáris.
Juohke lávdegottis leat 17 áirasa. Lávdegottit doibmet go ”miniriikkabeaivi”, dat mearkkaša ahte áirasiid čoahkkádus lávdegottiin speadjalastá riikkabeaivvi. Stuorimus bellodagas riikkabeaivvis lea maiddái eanemus báikkit juohke lávdegottiin.
Ráđđehus sajáiduhttá sin EU-politihkka EU- lávdegottis. Ráđđehus ferte ráđđehallat EU- lávdegottiin ovdal čoahkkimiid ministtarráđis ja čoahkkimiid EU:a stáhtaoaivámuččain- ja stáhtanjunnošiin Eurohpáráđis.