Riikkabeaivvi ságadoalli bargu
Riikkabeaivvi ságadoallis lea ovddasvástádus das got riikkabeaivvebargu plánejuvvo ja čađahuvvo. Riikkabeaivvi ságadoalli jođiha riikkabeaivvibarggu ovttasráđi sihke riikkabeaivvebellodagaid joavkojođiheaddjiin ja maid Riikkabeaivvehálddahusain. Riikkabeaivve ságadoalli jođiha maiddái čoahkkimiid riikkabeaivvegámmáris ja lea riikkabeaivvi ovddasteaddji sierra našuvnnalaš ja internašuvnnalaš oktavuođain.
Riikkabeaivvi ságádoalli lea alimus virgi masa okta olmmoš sáhttá válljejuvvot Ruoŧas. Árvodásis riikkabeaivvi ságadoalli lea stáhtaoaivámučča, gonagasa, maŋis muhto ovdal stáhtaministara.
Riikkabeaivvi ságadoalli evttoha stáhtaministara
Okta dehálaš bargu riikkabeaivvi ságadoallái lea jođihit šiehtadallamiid go ráđđehus rievdá ja buktit ovdan evttohusa ođđa stáhtaministarii. Dat vuohki lea áidnalunddot Ruŧŧii. Eará parlamentáralaš demokratiijain lea dávjá nu ahte stáhtaoaivámuš jođiha barggu go ráđđehus rievdá.
Riikkabeaivvi ságadoalli ii oassálaste politihkalaš riikkabeaivvebargui. Riikkabeaivvi ságadoalli lea válljejuvvon riikkabeaivveáirras, muhto ságadoalli ii oassálaste lávdegoddebargguin ja iige digaštallamiin ja jienastemiin riikkabeaivvegámmáris. Riikabeaivvi ságadoallis lea sadjásaš gii dahká daid bargguid.